ابني بياخد ايه في جلسة التخاطب؟

أولياء امور كتير بيسألوا ابني بياخد ايه في جلسة التخاطب او ايه اللي المفروض ياخده و امتى احس ان ابني هيتطور او بعد مده اد ايه و مدتها اد ايه جلسة التخاطب ؟

جلسة التخاطب بتكون في حدود 30 دقيقه ... محتوى الجلسه ايه ؟

لازم نشتغل علي 3 اجزاء او 3 مهارات مهمه جدا

▪️ مهارة الانتباه  (سمعي و بصري)

▪️ مهارة الادراك (سمعي و بصري)

▪️ تنميه لغويه (مهارات ما قبل اللغه - لغه استقباليه - لغه تعبيريه )

يعني ايه الكلام ده ؟

عشان الطفل يتكلم فيه اساس بتقوم عليه اللغه اللي هو
▪️ الانتباه البصري و السمعي انه يكون عنده تواصل بصري كويس و سامع كويس و بنتبه لما يحصل اي صوت حواليه و يكون قادر يحدد مكانه

▪️ الادراك البصري و السمعي يعني يعرف يطابق مجسم بمجسم و صوره بصوره و يفرز و يصنف و يركب بازل و يطابق من خلال النظر و الشئ و الظل و اكمال الشكل الناقص و الشكل و الارضيه و نمط تتابع و تدريبات الذاكره سواء سمعيه او بصريه اما الادراك السمعي فهو انه يمييز الاصوات زي صوت تخين رفيع راجل بنت اصوات الحيوانات الطيور. 

▪️ نيجي عند الكلام او اللغه عشان الطفل يتكلم فهو بيتعلم الكلام من خلال التقليد و دي بنشتغلها اول حاجه في مهارات ما قبل اللغه تقليد(حركي و صوتي) حركات صغرى و كبري زي انه يصقف يرفع ايد يخبط  بايد او برجل يحرك صوباع يفتح بؤ يحرك لسان. 

 اما التقليد الصوتي زي يقلد مقاطع صوتيه ااه باا تاا ماا و يقلد اصوات البيئه المحيطه زي حيوانات طيور مواصلات 

و بعدين ندخل علي اللغه و هي بتتقسم جزئين لغه استقباليه و لغه تعبيريه. 

اللغه الاستقباليه يعني اقوله هات تفاحه يجيب التفاحه و يكون عارفها وسط كذا مشتت او وسط كذا حاجه موجوده 

اللغه التعبيريه انه يعبر بالشئ و يسميه يعني اسأله ايه دي يقولي دي تفاحه. 

نبدأ بالتعرف على المجموعات الضمنيه (الخضروات و الحيوانات و المواصلات و اجزاء الجسم و الفواكه  و المشروبات و الطيور و الاثاث و ادوات المائده و الملابس و الالوان). 

يعني ايه الكلام ده ؟ يعني هنعرفه علي الشئ نفسه هنجيب مجسم او صورة موزه مثلا و نبدأ نعرفه عليها ايه دي موزه اعمل بيها ايه اقشر موزه خد موزه هات موزه لحد ما يكتسبها و بنربط الانشطه ببعض يعني نرجع للادراك البصري وانا بدربه على المطابقه بجيب صورتين موزه او مجسمين و اشتغل عليها كمطابقه و كتعرف للشئ. 

بنعرف منين انه عرفها بنعرضها عليه مع وجود مشتت تفاحه جنب الموزه و نقوله هات موزه لو جاب الموزه يبقى كده اتعرف عليها و ندخل على العنصر اللي بعده

لحد ما يكتسب كم من العناصر و نشتغلها تسميه معاه انه يسمي الشئ. 

▪️▪️ هياخد كام كلمه او كام عنصر ؟؟ حسب حالة الطفل ممكن2 من كل مجموعه ممكن عنصر من كل مجموعه يعني مثلا ممكن ناخد 4 مجموعات في الجلسه بؤ و تفاحه و عربيه و قطه مثلا و ممكن نزود عدد العناصر لو هو عنده محصول لغوي و بعدين بننقل علي وظائف الاشياء و بعدين جمله من كلمتين و 3 كلمات و هكذا. 

طبعا بياخد شهور مش وقت قليل و برضه حسب الطفل و استيعابه و استجابته و شغل ماما معاه في البيت و متابعتها باستمرار. 

امتى احس انه بيتطور ؟؟

 خلال 3 شهور لازم يكون فيه تطور في مهاره من المهارات اللي شغالين عليها دي و طبعا بالتدريب المكثف في البيت مع ماما هيكون فيه تطور بشكل اسرع (ايد لوحدها مبتصقفش)

▪️▪️ من حقك كأم تحضري جلسه مع ابنك عشان تشوفي ايه اللي بيحصل معاه و ازاي الاخصائي او الاخصائيه بتشتغل عشان تتعلمي تشتغلي ازاي في البيت مع ابنك بس مش من اول و ده لسبب مهم جدا ان الطفل لسه مأخدش على الاخصائي و طبعا مش هيقدر يسيطر عليه من اول جلسه مهما كانت خبرته و بيكون اول جلستين او 3 جلسات عباره عن جلسات الفه بين الاخصائي و الطفل عشان يكون فيه علاقه مهنيه سليمه  و ده حسب حالة الطفل و بيحدده الاخصائي و يبلغك. 

لازم يكون موجود كراسة متابعه الاخصائي يكتب فيها اهداف الجلسه و استجابة الطفل و اي ملحوظات على الطفل و ممكن يصورلك ڤيديو باستجابة الطفل لو احتاجتي و لازم الاخصائي يشرح ده ليكي كأم ده حقك الطبيعي و لما متعرفيش تشتغلي هدف من الاهداف من حقك برضه تحضري جلسه و تشوفي عملي مع ابنك ازاي الهدف ده بيتم التدريب عليه ...
▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️▪️

لجلسات التخاطب والعلاج السلوكي يمكنك زيارة🔻

رئيس قسم التخاطب بمستشفى المعلمين بسوهاج

أخصائي التخاطب وتعديل السلوك / محمد شافعين الأنصاري

بكل من:

🌏مجمع المصطفى الأسلامي مركز بطهطا محافظة سوهاج.

🌏جمعية ابن رضي بطهطا مركز طهطا محافظة سوهاج.

🌏مستشفى المعلمين بشارع الزهراء بمدينة سوهاج.

للتواصل / ٠١٢٨٦٨٧٤١٩٦ .